Legs, Legs, Legs Mo Ay Nakakasilaw

Guessing Game Ito.

Nasa SM Makati ako last Sunday para bumili ng konting grocery at para bilhan ng bestida ang prinsesa namin. Dahil medyo nagugutom na rin, naisipan ko lang na humanap ng mabibiling mabilis na snacks.

At napadpad ako sa Brownies Store malapit doon sa may bridgeway connecting ng Glorietta at SM. Okay na rin dahil mura lang- sa halagang 37 pesos, may brewed coffee at may brownies ka na.

So doon ako umupo medyo malapit sa counter. Inuumpisahan ko nang sipsipin yung coffee nang napansin ko na yung dalawang tao sa katabing table ko eh nagbubulungan at may tinitingnan. Kaya nakiusyoso na rin ako at narinig ko na pinagtatalunan nila kung yung tao ba na malapit sa amin eh si [insert name of poging politician here].

Dahil medyo nasusubaybayan ko rin dati ang political career at ang mga sinusulat sa blog ni [insert name of poging politician here], alam kong siya nga iyon. Kasama niya ang misis niya at umupo rin sila sa isa sa mga tables sa store ng Brownies, nakapwesto malapit doon sa mga taong labas-masok sa bridgeway ng Glorietta at SM. Kung bakit doon sila pumwesto eh may opinyon ako na gusto niyang ma-exposed sa maraming tao (dahil may planong tumakbong senador itong si [insert name of poging politican here]).

Anyway, so umorder na nga ng kape at brownies si [insert name of poging politician here] at bumalik na doon sa table at umupo katapat ng misis niya. At dahil katapatan ko siya, hindi maiiwasan na tuwing hihigop ako ng kape eh natatanaw ko si [insert name of poging politician here].

Nung minsang masulyapan ko siya eh saktong humihigop din siya ng kape. Pero ano ito? Mukhang habang humihigop siya ng kape eh tutok na tutok ang paningin niya sa malapit sa lugar ko. Naisip ko dahil malapit nga ako sa counter, "ah, siguro tinitingnan niya yung mga naka-display na brownies and pastries at gusto niyang bumili".

Pero nung tinunton ko na ang pinagkakaabalahan ng mga mata ni [insert name of poging politician here] ay napagtanto ko na ang tinititigan pala niya eh yung isang customer na nakapila sa cashier. Hindi pala yung customer. Ang tinititigan pala ni [insert name of poging politician here] eh yung legs ni customer, dahil si customer eh naka nyort-nyort (short shorts).

Naisip ko lang, paano na lang kung nahuli siya ng kanyang esmi habang nakatitig kay sexy customer? Sasampalin kaya siya at aawayin ni misis?

Well, anyway, si [insert name of poging politician here] ay gwapo at mukhang malinis; dating nasa isang paksiyon ng oposisyon pero kailan lang ay lumipat sa isa pang paksiyon ng mga oposisyon at may planong tumakbong senador.

Hindi siya tunay na tiga-Luzon at hindi siya tunay na tiga-Visayas. Pero sa nakita ko, masasabi kong isa siyang tunay na mahilig (sa legs).